یوسی کوہن اسرائیلی خفیہ ادارے موساد کے سربراہ مقرر

مہر خبررساں ایجنسی نے ٹائمز کے حوالے سے نقل کیا ہے کہ اسرائیلی وزیراعظم نے قومی سلامتی کے مشیر یوسی کوہن کو خفیہ ایجنسی موساد کا سربراہ مقرر کردیا ہے ۔ موساد کے سابق افسر یوسی کوہن دو سال سے اسرائیلی وزیراعظم کے قومی سلامتی کے مشیر ہیں ۔ وہ تیمر پاردو کی جگہ موساد کے سربراہ کا عہدہ سنبھالیں گے ۔
موساد کا سربراہ اس خفیہ ایجنسی کا واحد رکن ہے جس کا نام عوام کے سامنے ظاہر کیا جاتا ہے ۔ اسرائیلی وزیراعظم بن یامین نیتن یاہو نے یوسی کوہن کی تقرری کا اعلان کرتے ہوئے کہا کہ وہ موساد میں کام کے وسیع تجربے ، شاندار کامیابیوں اور تسلیم شدہ صلاحیتوں کے مالک ہیں۔ موساد براہ راست اسرائیلی وزير اعظم کی نگرانی میں کام کرنے والا جاسوس ادارہ ہے۔